立法會會議廳前廳，素來係記者同市民嘅禁地，能夠出入嗰度嘅人，主要係尊貴嘅議員同埋特區高官，呢個傳統由舊大樓到新大樓，一直無變。之不過變幻才是永恒，搬屋之後，前廳變得水盡鵝飛，好多時鬼影都冇隻，據聞立法會秘書處為求有大改善，正考慮為前廳做啲小改變。
立法會搬家後，議員辦事處就喺新大樓上面，所以議員好少再蒲前廳。對於特區高官嚟講，佢哋想搵議員吹水游說就艱難咗，有議員直頭形容，咁樣係影響咗行政立法關係。秘書處考慮緊改善吓前廳嘅格局，至於點改就仲諗緊。
另一邊廂，秘書處尋日發通告話，從今開始，新大樓其中一間會客室同五樓嘅等候室，會開放畀議員用嚟開會，皆因議員想有間就腳啲嘅房，方便佢哋星期三大會期間約見選民或團體。新大樓有咁多改變證明啲乜？咪就係凡事用到至知有乜不足囉。