人民力量立法會議員陳偉業（大舊）居住大嶼山，經常行山接觸大自然，吸收天地靈氣，原來佢行山除咗欣賞花草樹木外，仲意外發現到野生木耳及靈芝。大舊尋日喺社交網站facebook留言，話自己最近行山發現多棵野生靈芝，棵棵大過手掌，真係執到寶，但反而大舊就有啲疑惑，話唔敢摘嚟食，仲呼籲有冇呢方面嘅專家可以畀啲意見佢喎。
大舊嘅留言一出，有朋友就叫佢唔好亂咁食，因為啲野生植物可能有毒，唔好學「人在野」節目主角咁野外求生喎。我哋問過大舊，佢話已經唔係第一次遇見靈芝，之前見過嘅靈芝仲大棵，仲話呢啲靈芝只有一至兩年壽命，之後就會枯萎，但佢話絕對唔會摘嚟食，以保護生態環境。不過，大舊坦言以前亦曾發現過野生木耳，試過摘返屋企用嚟炒雜菇食，味道十分鮮美。