政情：法律兩陣營高院開戰
正當特首選戰分開梁營同唐營嘅時候，特首選委戰當中嘅法律界原來亦都分開咗紅、藍兩個陣營，佢哋尋日仲一齊喺高等法院門口鬥派傳單，各不相讓。
由前大律師公會會長陳景生帶隊嘅「ProDem22」同「PanDem8」，昨日一行十幾人攞住紅色嘅宣傳單張去高院門口派畀啲法律界人士。但與此同時，由律師會副會長林新強帶隊嘅「VoxPop」亦都拎住十幾份藍色嘅宣傳單張，企喺「ProDem22」隔籬一齊派，高院門口一時間變得非常熱鬧。
陳景生同大律師潘熙早兩日仲專登整咗段相聲宣傳片，潘熙話參選係為咗擴大小圈子選舉，陳景生就回應話要為香港人揀選一個好特首，兩個一唱一和咁，認真合拍。
兩個陣營都話唔一定支持泛民嘅特首選舉候選人，林新強話，因為唔想浪費選民嘅選票，陳景生亦都話，唔會盲目支持泛民候選人。