政情：區會委任名單捱鬧難逃
今屆區議會選舉建制派大勝，隨即爆出種票風暴，以火燒連環船之勢愈燒愈烈，燒到政制及內地事務局及選舉事務處身上。種票火頭未熄，另一火頭又燃起，就係快將公布嘅區議會委任名單。據聞政府打算喺普天同慶嘅聖誕前夕，即係本月廿四號平安夜公布新一屆區議會委任名單，相信係諗住以接連幾日聖誕節假期做緩衝，唔會畀人鬧得咁甘，但種票事件已被各界鬧爆，預計當局喺公布區議會委任名單後亦難逃劫數。
新一屆區議會委任議席數目，雖然由原來一百○二個削減三分之一至六十八個，但泛民主派仍擔心政府嘅委任準則，包括會否堅守「六六原則」不再委任做滿兩屆委任議員、是否重施故技將做滿兩屆委任議員轉區再度委任、是否委任落選議員、是否委任放棄直選等待委任嘅人士、是否按比例削減每個區會嘅原有委任議席，否則政府會在泛民佔優嘅區議會安插較多嘅委任議席，從而主導有關區會嘅控制權。
盧偉國隨時做足16年！
其實泛民嘅憂慮並非無理據，事關聽聞政府擬訂嘅委任名單相當離譜，而物色委任人選方面更由各區民政事務專員任意妄為。我哋之前講過，多年來參與直選嘅沙田區議會主席韋國洪，今年突然放棄參選，傳政府會委任佢重返議會。另外仲有因為失落鄉事委員會主席而喪失當然議員身份嘅劉皇發及林偉強，據聞政府亦有意分別委任佢哋重返屯門及離島區議會。
最近亦盛傳放棄競逐連任沙田區議會瀝源選區嘅簡松年，其兒子簡汝謙會獲委任為沙田區議員。另外，做咗三屆沙田區委任議員嘅盧偉國，傳聞政府仲想委任佢做多屆，倘若成事，就可以做足十六年委任議員，真係聞所未聞。
我哋仲聽聞，由於政府好大機會唔再委任做滿三屆深水埗委任議員嘅陳東，其區議會主席之位，令建制派內部爆內訌爭崩頭。
近年政府每逢公布重要消息，都會儲埋一齊逼埋喺周五或假期前夕公布，目的係等傳媒疲於奔命無暇兼顧，鬧少啲政府，而區會委任名單喺平安夜公布，只不過係重施故技。不過，泛民喺區會大敗後，打擊種票不遺餘力，如今委任制再助長建制派喺各區會嘅實力，必定群起而攻之，睇怕政制及內地事務局局長譚志源呢個聖誕肯定有排煩。