中環出更：珊珊母女擦盆菜放天燈
天氣轉冷，最好就係圍埋一齊食盆菜。保良局上周六舉行慈善盆菜宴，筵開百多席，大會仲安排咗放天燈環節，畀各善長將心願貼喺天燈上面許願。擔任籌委會主席嘅保良局總理馬清楠一家、總理陳正欣（Daniel）一家、仲有滑浪風帆天后李麗珊同兩個囡囡都有到場湊熱鬧，個個一家大細非常溫馨。
珊珊話自己退役後主力湊女，充滿運動細胞嘅佢，會畀囡囡嘗試各項運動，滑浪、獨木舟、溜冰、滑雪樣樣齊。佢兩個囡囡分別只得六歲及四歲，唔驚佢哋會整親咩？珊珊就話，愈細個開始接觸運動，愈能夠鍛煉到身體嘅敏捷度喎。
Daniel同太太陳慕婷都有個乖女Latisha，卓妮見小妮子長得嬌滴滴，原來文武雙全，除咗彈琴、繪畫，仲係學校啦啦隊隊員，喺運動會上攞過冠軍添！
名人聖誕外遊避寒
Daniel話，今年冬天特別凍，嚟緊聖誕節想去南方旅行避寒，其中澳洲同紐西蘭係首選，因為可以自駕遊喎。
當晚卓妮仲見到總理林潞（Calvin）同啱啱加入保良局嘅「生力軍」張智彥（Human）。Calvin話無懼泰國水災，聖誕節會過去度假，避開唔去災區就得喇。做印刷嘅Human就工作至上，聖誕會喺公司度過喎。