中環出更：莊偉茵慈善騷空姐行貓步
國泰企業事務董事莊偉茵（Quince）係城中精叻大公關，連國際著名時裝設計師譚燕玉（Vivienne Tam）都被佢打動，首次幫由Quince擔任主席嘅「生活教育計劃」（LEAP）舉辦慈善時裝騷。Vivienne無現身，但借出多套2012年春夏新裝，任着唔嬲。
慈善時裝騷上周六喺太古集團主席白紀圖豪宅舉行，吸引逾百人參加。白主席嘅山頂大宅好少對外開放，今次為慈善犧牲，認真唔話得。
譚燕玉借出春夏新裝
Quince專登搵埋成班空姐行騷，國泰空姐出名省鏡人所共知，行起T台，個個神態自若，十足超模。一眾賓客喺英式花園內，一邊歎國泰提供嘅精美下午茶，一邊欣賞由Vivienne設計名為「ZEN GARDEN」嘅春夏新裝，人景合一，絕配也。一個下午，輕易籌到一百五十萬港元善款。
Vivienne咁善心，獲大會委任佢為LEAP嘅「愛生命之友」。Qunice又匯報成績表，笑言過去兩年，每年為八萬八千個學生提供預防濫藥課程，所以派對主題都訂為「88000個該慶祝的理由」喎。空姐行騷收視率咁高，如果Quince將呢個概念搬上飛機，乘客一定舉腳贊成啫！
卓妮