中環出更：吳傑莊搵姚明 開壇助港青
香港青年學生動力主席吳傑莊（Johnny）身兼多項青年工作，深知時下港青嘅共同問題係欠缺人生方向。早前佢夥拍新民黨田北辰做主席嘅國際創意及科技總會，合作搞咗個中學生短片創作比賽，鼓勵港青拍出心目中嘅香港精神，並將得獎短片與專業導演拍攝嘅短片輯錄成為電影《香港心》，上周六就喺太古城中心搞咗場首映禮。
嘆高官冇叫座力
Johnny話，為咗啟發年輕人嘅鬥志，佢經常搵名人搞講座，以前搵過國寶級「跳水公主」郭晶晶等奧運明星舉辦講座，嚟緊打算斟吓「中國巨人」姚明或「中國飛人」劉翔。佢話，要吸引年輕人出席講座都幾頭痛，曾經試過有一場匯聚政府高官等政治明星嘅講座，結果要動員人情搬救兵，但都只係班到約一百人出席，認真慘烈。
年輕人欠缺目標，Johnny就話自己入理工大學前已立定將來嘅工作目標，所以畢業後就創業，難怪佢咁後生就有如此成就。
