政情：梁佑嘉父捲種票疑案
新進歌手梁佑嘉（Abella）開始喺樂壇嶄露頭角，近期更忽然紅起來，事關有傳佢爸爸就係區議會選舉深水埗美孚新邨「一屋七姓十三票」懷疑種票風波嘅男主角梁平。不過，據聞梁平喺事件曝光後已經匆忙搬離美孚住所，連警方重案組探員都搵唔到佢。
梁平八十年代初喺廣州茂名來港，當初靠喺深水埗收購唐樓，再「劏房」出租賺得第一桶金。佢同太太創立咗一間地產公司，傳聞有唔少物業，依家仲係多間公司嘅董事長添，所以梁佑嘉都可以話係太子女，就算唔紅都唔使憂嗰隻。
梁平同內地關係都幾密切，除咗係茂名市政協常委外，亦係香港茂名同鄉會董事。此外，佢○九年曾獲世界華商基金會頒發「第十一屆世界傑出華人獎」，美國加州國際大學亦曾頒授榮譽博士畀佢。不過，幾威水都好，梁平今次捲入種票風波，睇嚟都幾頭痕。