政情：馮煒光陰招謀踢走單雞

白鴿黨近日接連舉行咗兩場內部會議，檢討區選結果同商討立會選舉部署，其中首要解決嘅係派乜嘢人出選超級區會？想爭一席定兩席？以及會否借票畀其他唔夠十五個提名參選超級區會嘅泛民黨派？結果大部分與會者，都認為喺比例代表制同其他泛民競爭下，白鴿黨冇乜可能爭到兩個超級議席，因此對借票提名他人持開放態度，但對於派咩人選就有唔同意見。

知名度低 人緣欠佳

有人支持按原定計劃，派民望最高、喺黨內又最唔會引起爭議嘅鐵頭仁出戰，但亦有人認為既然只係想爭一席，派個二線人物或第二梯隊都夠贏。其中喺港島南區海怡西選區成功連任嘅馮煒光，就率先表態想選超級議席，令人以為佢咁大方將港島區嘅直選名額，讓畀喺灣仔大坑選區落選嘅單雞。

不過，有白鴿黨中人質疑，馮煒光喺黨外嘅知名度同黨內嘅人緣欠佳，點計都冇理由將呢個幾乎贏梗、並極具象徵性嘅超級議席拱手讓畀佢，估計佢只係想預先叫高啲個價，到最後即使唔畀佢選超級，亦會留番港島區個位畀佢，令單雞無位出選。

除咗馮煒光，今屆喺油尖旺奧運選區「爆冷」勝出嘅涂謹申，據聞亦有意參選超級區會。雖知佢一向唔鍾意做地區，加上好想選立法會嘅黨友黃碧雲喺九龍城黃埔東選區輸咗畀梁美芬，如果阿涂轉戰超級，就可以讓出九龍西個位畀黃碧雲。

不過，無論係馮煒光定阿涂選超級，都會產生另一問題，就係鐵頭仁會留番喺新界西出選，令到喺新西等咗上位好耐嘅陳樹英、黃偉賢同尹兆堅等人，要爭崩頭先出到線，隨時又掀起另一場惡鬥。