中環出更：蕭嘉怡防酒吧入侵住宅區
中環蘭桂坊同蘇豪區嘅酒吧成行成市，市民同旅客絡繹不絕，據聞好多酒吧見有利可圖，一直密謀擴大營業版圖，將酒吧生意踩入接近中半山嘅住宅區，即時觸及居民神經。啱啱喺區議會選舉中西區東華選區勝出嘅「八十後」蕭嘉怡就下定決心，話上任後首要工作係嚴防酒吧伸延至住宅區，又反建議將社區打造成文化藝術集中地。
租貴焗搞流動辦事處
嘉怡擁有一副baby face，外表嬌滴滴，有人以「童顏」、翻版「沈佳宜」來形容佢，相當搞笑。不過，笑聲背後仍要面對地區實務工作，為嚴防酒吧進入社區已令嘉怡煞費思量，而且仲煩緊喺邊度開設議員辦事處。話說嘉怡本來預算將二萬元議員實報實銷津貼，平分作租金開支同議員助理薪金，點知一睇堅道一個四百呎地庫舖位，居然要月租六萬元，即時令佢打退堂鼓。
嘉怡坦言，六萬元一個月租金根本負擔唔起，又話除非有慈善團體願意租出場地，否則喺堅道一帶好難搵到落腳點，佢已經就此作出最壞打算，就係搞流動辦事處，但代價就係每日要來回上落超過四百級樓梯。不過，嘉怡同當區街坊打成一片，街坊「契女」嘅形象深入民心，如果一眾契爺、契媽知佢有難題，唔知會否發揮群眾力量幫契女解決呢？