人鼻驗油煙 環保署兒戲

陳先生家住皇后大道西，居所面向石塘咀市政大廈，入住未幾即發現熟食中心食肆「升火」煮食時，油煙及煮食氣味便會透過抽油煙機湧出，陳家便首當其衝「接收」大量油煙氣味，陳先生對此大感困擾，「熟食中心冇窗，同我屋企只係隔咗條馬路，就算我閂晒窗開冷氣，對面就算係打邊爐我間屋都聞到味！」

辯稱儀器難測喜惡

陳氏夫婦遷入現址已有數年，陳太最近更懷有身孕，每日在受油煙影響下更引發鼻炎，擔心會影響胎兒發育，「日日夜夜都有味攻入嚟，臭到根本瞓唔到，我太太依家大緊肚仲辛苦，幾時先可以解決？」陳曾先後向食物環境衞生署、機電工程署投訴，僅獲回覆抽油煙機運作正常。未料向環保署投訴時竟換來「搞笑」回應，「環保署只係派人嚟聞，然後話冇問題就走，呢個係咩測試標準？用個鼻聞咁兒戲？」

環保署發言人解釋，氣味的組合成分相當複雜，現時評估氣味仍未能單靠儀器準確量度及決定氣味的喜惡程度。發言人強調該署與其他國家做法一樣，派員以嗅覺進行氣味評估，亦憑經驗客觀評估油煙排放是否構成空氣污染。經過三名職員評估後，並未發現石塘咀熟食中心違反《空氣污染管制條例》。

「電子鼻」可度化學物

食環署發言人則說，上址熟食中心檔位的廚房油煙會經由抽氣系統抽走，再經過靜電除塵器或水劑滌氣系統處理後排出街外。機電署曾派員檢查後發現系統運作正常。而兩署職員亦曾於晚市時間到訪陳家，並未發現過量油煙從抽氣系統排出。

「噪音、空氣，甚至光污染都有得度，雖然氣味好難度，但都唔可能淨係靠人鼻去聞！」立法會民政事務委員會委員陳克勤直指環保署輕視氣味污染的影響，僅以人鼻量度更有欠客觀。

陳指現時將軍澳堆填區使用的「電子鼻」，雖只能量度特定化學物氣味，暫未能應用於測量普通氣味污染，但科技日新月異，環保署應更新儀器，研究新的測量標準，「最緊要係環保署肯去正視問題，唔好畀人覺得政府唔理呢個問題！」

記者：梁少儀