來自新界廿七個鄉事委員會嘅原居民尋日不惜「玩火」，怒燒發展局要村民自行登記僭建物興建時間嘅小冊子，又燒埋寫上發展局局長林鄭月娥個名嘅紙紮棺材同埋紙紮公仔，認真大吉利是。保安局局長李少光事後回應時，被追問村民咁做會否對官員構成恐嚇，佢就一路傻笑一路妙答：「呢個要睇睇佢驚唔驚先，如果覺得被人恐嚇到好驚嘅時候，佢可以去報警。」四両撥千斤，就將個問題撥走咗。
