區議會選舉後，對自由黨嚟講簡直打咗一支強心針，因為不僅六名現任區議員可以連任，最有指標性嘅中西區山頂選區陳浩濂同南區海灣選區嘅馮仕耕等都贏晒，依家一共有九席，所以個心好難唔雄。自由黨前晚開咗個退修營，討論到佢哋明年派人出選立法會，一班年輕人磨拳擦掌，話自由黨嘅隊形已經返番嚟，認為應該積極考慮直選，其中只有張宇人不為所動，一於留喺飲食界功能組別打躉。
自由黨榮譽主席田北俊將會出選新界東，已經愈講愈真，至於該黨一直躍躍欲試嘅港島，據聞佢哋認為有多個人選都適合，包括黨主席劉健儀、副主席周梁淑怡同批發及零售界立法會議員方剛都可以。
其實自由黨覬覦港島咁耐，一直喺個思考圈裏面轉，一直議而不決，仲唔落區做嘢，就真係講乜都無用嘞。自由黨新一代雄心萬丈，可喜可賀，大膽支持佢哋直選，個黨就可以保持活力，唔知黨核心會唔會咁諗呢？