政情：被轟無料到馮驊照播帶
深得外號「人肉錄音機」、政務司司長林瑞麟真傳嘅選舉管理委員會主席馮驊，尋日喺特首選委會區議會界別選民簡介會上展示功力。佢全程照稿讀之餘，仲一味自說自話，全場約五十位與會者都懶得問佢嘢。唯一開聲嘅觀塘區議員陳國華，一開口就鬧爆馮驊。
尋日馮驊喺會上講完一輪嘢後，陳國華就舉手發言，喪插簡介會入場安排混亂，馮驊講嘢無料到，淨係講啲佢自己想講嘅嘢，此外陳國華打過電話去選舉事務處嘅熱線查詢，點知職員乜都答唔到，總之就激到佢火都嚟埋！佢仲即場投訴，佢哋參選選委嘅選民登記冊中，竟然仲有落選咗嘅區議員，擺明出錯啦！
被鬧到狗血淋頭嘅馮驊，好理性地播帶話，選舉事務處嘅職員只能夠答程序問題，策略性嘅嘢係答唔到o架，至於有關佢自說自話，佢希望大家聽得明佢講乜，另當局亦承認登記冊技術性出錯，佢哋會重新整理。