政情：廠商會派錢助單親家庭
一年一度工展會話咁快就到。今年除咗展品多，仲有錢派。候任廠商會會長施榮懷（Irons）話，會方將拎出三百萬元，向六千個單親家庭派五百元現金，等佢哋入場買心頭好。真正惠及基層，認真唔話得。
今屆工展會將於十二月十日喺維園舉行。百物騰貴，但唔少參展商依舊平賣益街坊，實行抗通脹。呢次派錢，將同東華及香港提升快樂指數基金等機構，甄選合資格低收入單親家庭，等佢哋有個開心聖誕。Irons話，五百元點用並無限制，買麵、買油、買海味，乜都得，屆時將有社工陪同shopping，確保筆錢唔會畀人濫用。
廠商會又大力開拓中國內銷市場，明年四月將首次喺武漢搞工展會，部分港產品牌好受內地人歡迎，同胞聽見有工展會，帶定大皮篋等掃貨。