政情：Eva鄭那些年拍拖搭叮叮
運輸及房屋局局長鄭汝樺（Eva）好少提到自己屋企，連個名都無冠以夫姓，不過佢尋日出席電車公司新型號電車啟用禮時，竟自爆當年同男朋友一齊搭「叮叮」拍拖。佢尋日出席一個電車活動時勾起佢嘅當年情，話後生嗰陣由電車西面總站搭到東面總站，到咗依家，當時嘅男朋友已經變咗老公，仲有兩個女，佢哋都時不時喺星期日晏晝一齊搭「叮叮」享受家庭樂。
Eva尋日話，佢年輕時喺港大讀書，佢男朋友嚟搵佢後，大家就一齊搭「叮叮」由西面總站去到東面總站，慢慢拍拖談情，嘩，真係閒閒地搭成個幾兩個鐘喎，幾咁浪漫。呢個回憶對鄭汝樺咁重要，難怪電車要換新款時，鄭汝樺都特登提醒電車公司董事總經理夏睿德，千祈唔好換走電車個「叮叮」，否則令香港人無咁個集體回憶，好多人都唔會「肯過」電車公司架喇。