政情：阿陶唔掂掀九東激戰

明年立法會選舉九龍東多咗一席，喺黃大仙打躉成廿年嘅陶君行原本都吼住呢個位，皆因佢上一屆落敗，但都有成二萬八千幾票，成績唔差。點知社民連喺區議會選舉大敗，陶君行自己都保唔住區議會席位，仲要搞到辭埋社民連主席一職，今屆立法會選舉恐怕都係凍過水。少咗一個對手，原本已喺立法會各有兩席嘅泛民同建制派對多咗嘅一席仲唔爭崩頭﹖

據聞強勢復出嘅工聯會副會長陳婉嫻原本計劃同李德康、及喺區議會選舉讓出龍上選區畀佢嘅林文輝同一名單出選，但依家會有變化。喺區議會選舉大勝嘅嫻姐估計會爭取做超級區議員，而李德康就會以九龍東居民委員會會長身份另組名單參選，即係將原本計劃嘅名單分拆，分散投資望博多一席。

不過其實建制派嘅如意算盤都未必打得響，因為雖然話多咗一席，競爭亦相對大咗。而且睇番泛民喺區議會選舉嘅成績，撇除受到外傭官司影響嘅公民黨，同發動狙擊嘅社民連，民主黨嘅得票並唔太曳，出年立法會選舉分分鐘可以吸埋社民連啲票添，如果情況屬實，代表民主黨出選嘅胡志偉或李耀基，要當選就更穩陣嘞。

謝偉俊想分一杯羹

除此之外，依家喺立法會功能組別嘅謝偉俊亦心思思想轉做直選議員，聽聞佢都睇中咗九龍東，打算落九龍東參加直選。而且，九龍東近年亦有一啲獨立建制派崛起，佢哋亦有意喺九龍東分一杯羹。

所以話，嚟緊立法會選舉，九龍東應該會七國咁亂。