中環出更：葉瀚華潮打Prada幼身呔
馬會大董葉澍堃識食識歎，細仔葉瀚華（Ian）自細受到爸爸耳濡目染，對飲食衣着品味自有高要求。日前卓妮見佢潮戴Prada幼身呔，襯上淺灰色西裝，穩重中帶些少潮味，啱晒佢嘅律師身份。不過Ian就嚟唔再自己執業，明年初將加入全球知名嘅麥肯錫顧問公司擔任管理顧問。
專欄分享飲酒心得
Ian唔止係專業人士咁簡單，佢仲係專欄作家，得閒就寫吓飲酒心得。原來佢好鍾意飲紅酒，十年前跟爸爸一齊出去應酬，初次飲咗意大利頂級佳釀Masseto，一試即愛上，從此與紅酒結下不解之緣。
幾杯靚酒落肚，文筆自然好似行雲流水咁順暢，不過Ian謙稱自己仲學緊寫作，事關佢中學時期就負笈海外，中文唔係好得。卓妮睇過佢嘅大作，覺得佢文采青出於藍，比起爸爸一啲都唔輸蝕。