中環出更：司徒健堅持理想圓音樂夢

撕會考證書表心迹

阿健七歲就開始學二胡，自此夢想考入演藝學院進修音樂。惟年前爸爸因病去世，哥哥毅然輟學，投考警察養家，家人都大力反對佢放棄升讀大學去讀演藝，雙方一度冷戰，不過阿健撕爛會考證書嘅決心感動咗家人，哥哥亦明白「冇幾多個人可實踐到自己嘅理想」，終於讓阿健圓夢。

阿健話，佢喺修讀課程期間，為節省膳食開支，特登買電飯煲自煮，慳慳埋埋萬幾蚊到內地交流。○八年佢考到賽馬會三十萬元獎學金，家人終於睇到佢努力嘅成果，關係正式破冰，現時佢仲繼續進修指揮課程添。

賽馬會慈善事務高級經理鄧家鳳話，馬會每年設廿七個獎學金名額予本港及內地學生，總撥款額已達一億七百幾萬元，資助三百幾名學生。