中環出更：吳苑清半途出家「舞」出色
海天堂以造龜苓膏起家，原來仲發展埋藝術事業，由老闆吳耀明太太趙鳳儀擔大旗成立「海天藝術學院」，愛女吳苑清（Catherine）就做藝術總監，母女齊喺標準舞上大展亮麗舞姿。
怕肥修身 展露性感
一般人覺得跳舞要由細學起，否則骨頭硬晒軚難練得好。Catherine剛剛相反，喺英國讀完大學返港，廿幾歲先學跳舞，卻喺短短幾年間不斷獲獎，全因得到媽媽遺傳舞蹈細胞。咪睇Catherine依家擁有一條蛇腰，原來佢喺國外留學期間身形暴脹，返港之後畀朋友笑佢肥，於是的起心肝跳舞修身，終於變番苗條淑女。
佢話，可能細細個跟媽咪周圍表演集體舞，見慣世面，依家着起性感舞衣，都唔會怯場。除咗舞蹈界，Catherine仲活躍於社會公職，舊年成立青年智專，匯聚「海歸」派、本地同內地各界青年，搞唔同類型活動，為會員增值自己，好似品酒班、遠足、內地交流團咁，擴闊年輕人視野。
現時Catherine主要幫公司做市場推廣同拓展業務，佢透露公司未來將會同一位特別「代言人」合作，仲會推出一系列新產品添，不過佢話暫時賣個關子，下年初大家就會知。