中環出更：理大總裁協會歎懷舊京菜
理工大學總裁協會廿幾位為食老細，早前一個晚膳時間，齊齊現身尖沙咀麼地道嘅老牌京菜餐廳鹿鳴春，大啖經典懷舊官府菜。眾人一邊歎美食，一邊討論即將舉辦嘅理大「紫荊花盃傑出企業家獎」活動，盡興又充實。
協會理事長楊志雄夫婦、副理事長洪劍峰夫婦及囡囡洪樂琳、副理事長「假髮大王」趙振國（CK）係聚會嘅鐵腳，幾忙都要嚟擦餐飽，理大企業發展學院副院長黃亮都喺度。鹿鳴春老闆陳基順見咁多貴客到，親自出面打點。
鹿鳴春嘅鎮店名菜好多，包括北京填鴨同鐵板焗鰣魚等，經常喺外國觀光雜誌亮相嘅主廚文師傅當晚親自操刀，為北京填鴨片皮上碟，鮮甜肉汁令人食指大動。京菜其實源於山東菜，難怪山東人CK好自豪話，呢道菜應正名「山東填鴨」至啱。
CK家藏萬斤紹興酒
當晚最精彩莫過於CK獻上嘅私伙陳年紹興酒，靚酒仍未入口，已滿室飄香，令人未飲先醉。原來十幾年前佢豪氣訂造咗一萬斤紹興酒，珍藏喺家中酒窖，遇有盛事先至會拎啲酒出嚟與老友同享，聽到大家「嘩嘩」聲，勁讚佢不愧係食家！
大家食指大動但不忘傾正經嘢，佢哋講起得獎者以內地傑出民企為主嘅紫荊花盃，都話要喺理大嘅平台上，加強中港企業交流喎！
卓妮