如果小學生計錯數，會有乜嘢後果呢？正常而言當然係考試唔合格啦，隨時仲要受到老師處罰。之不過咁，以今時今日盛行於世嘅小學雞心態推算，話唔定會有塞豆窿同老師講，計錯數冇乜大不了啫，而且錯得愈離譜愈好，長大之後我要做財爺！
呢嗱嗱嗱，唔好以為小學雞講得冇道理呀，畢竟財政司司長曾俊華確係一個不斷計錯數嘅傻瓜，難免會產生教壞細路嘅不良效應。根據特首候選人唐英年嘅偉論「我屬龍所以我唔蠢」，鬍鬚曾一定唔係龍年出世。
曾財爺計數到底錯成點？原本估計庫房出現八十五億元赤字，點不知地政總署資料顯示，本財政年度頭七個半月已錄得六百三十億元地價收入，全年地價收入可望突破一千億。有會計師行預測，庫房將有三百八十億元盈餘。簡單咁講，曾俊華計錯數係以百億計，全香港冇一隻小學雞能出其右，被封為「估錯王」實在當之無愧。
當然啦，計錯數亦有可能係苦肉計，因為守財奴最鍾意玩狼來了把戲。財爺一話手緊，咁咪大條道理拒絕開倉派米囉。
「東方報業民意調查」顯示，對於曾俊華再次估錯財政狀況，庫房隨時扭虧為盈，三成七受訪者認為，庫房水浸應有更多紓困措施；兩成五批評曾俊華理財能力不足；兩成三坦言對港府冇期望，計錯數已經見怪不怪。
即係咁，理得你計錯數係出於先天性愚蠢定係後天性陰謀，普羅大眾嘅反應實屬人之常情，有錢就唔該你還富於民啦，官富民窮好唔健康啫。
關於市民嘅願景，兩成六希望新一份預算案加碼紓困，以消除官富民窮；兩成六希望繼續派錢；兩成五希望減稅或者退稅；兩成二希望有免租、免差餉、電費補貼等等措施。
講真吖，家陣經濟環境真係岌岌可危，一個歐債危機殺埋嚟，成個地球怕且又要面臨另一場金融海嘯。既然係咁，功夫茶向孤寒財爺強烈呼籲，千祈唔好做一隻不可理喻嘅小學雞，必須推出一連串惠民方案，派米先至可以積穀防飢吖嘛！
至於通脹導致加風持續，四成受訪者恐怕來年勢必百上加斤；兩成七擔心會有連鎖反應掀起加價潮；兩成六憂慮會進一步刺激通脹。港府預料今年第四季通脹見頂，大部分受訪者不認同，四成四仍然感受到百物騰貴嘅壓力；兩成六認為港府太樂觀；兩成三覺得通脹持續高企未見頂。
唉，好心「估錯王」唔好再玩乜嘢通脹見頂嘅爛鬼預測，必須切切實實利民紓困，否則民怨唔會見頂！