近年保育變咗城中熱話，由皇后碼頭、何東花園、中環街市，到近日終於被評級的舊政府總部西翼，好多都引起大眾嘅關注。
財政司司長曾俊華見大家講保育講得咁興起，就喺佢個網誌講佢四處遊歷時見到嘅保育成功例子，仲話人哋用好平嘅價錢都做到好好嘅效果，好似喺度暗寸發展局局長林鄭月娥咁。
話說鬍鬚曾月初去咗法國康城以中國代表團身份出席二十國集團高峰會，喺巴黎發現咗一條火車軌保養得好好，鬍鬚曾就有感而發咁話，其實歐美唔少已棄用嘅鐵路都活化得好好o架，不過要數到最吸引佢嘅，都係紐約一個公私營合作嘅保育項目High Line Park。
鬍鬚曾話，依個公園非常有特色，因為佢好巧妙咁將一條原本高架嘅路軌轉化做一個空中公園長廊，不過整個工程都只係用咗五千萬美元，即係連四億港元都唔使。前排林鄭搞何東花園保育，外界一度話政府分分鐘要賠成廿億，但當林鄭搞保育搞到一頭煙嘅時候，鬍鬚曾無幫手之餘，仲喺度風花雪月，究竟呢個係乜嘢團隊嚟架？