政情：A16聯盟 揼本拉票
選舉委員會分組界別選舉，各個界別嘅候選人都落力拉票。參選會計界嘅 「A16聯盟」就好揼本喇。佢哋集體印製咗選舉用嘅卡片，卡片上除有成員嘅電話、電郵地址等資料，內頁仲有佢哋十六個成員一齊影嘅團體大合照同成員名單。聯盟召集人葉冠榮（Ernest）話，咁樣能凸顯佢哋嘅團隊精神喎。
「A16聯盟」十六名成員有十人來自四大會計師行，聲勢浩大之餘相信選舉工程亦好有規模，集體印製、專為選舉用嘅卡片每人有一千張。卡片上各人嘅聯絡電話頭四個號碼都一樣，睇嚟係特別為今次選舉，出咗一個系列嘅電話號碼。
我哋問Ernest，又要搵人影相，又特登設立競選電話專線，要花費幾多選舉開支。Ernest就話呢啲都係助選團搞，佢就唔清楚喇。
不過，會計界選民有成二萬幾人，根據選舉活動指引，每個候選人選舉開支嘅最高限額為四十八萬元咁多，照睇應該唔會爆煲嘅。