政情：政府總部會議室使用無期

新政府總部原來有兩個會議室，設計都係超級豪華。據聞新政府總部有個細啲嘅會議室，係打算喺開記者會時用嘅。裏面有晒最先進嘅儀器，可以畀啲電台、電視台嘅記者同攝影師使用。呢個會議室入面仲有可以展示多個唔同畫面嘅大螢幕，班高官開會時有冇分心、瞌眼瞓都一目了然。

但原來呢個細會議室又係夕陽政府嘅大白象工程之一，皆因個會議室到依家都一直丟空冇人理。話說煲呔曾原本打算喺發表最後一份施政報告時，用呢個會議室開記者會，之不過有人話佢聽，如果喺嗰度開記者會，啲攝影機就會影到佢身後嘅大螢幕，視覺上唔係咁靚仔咁話。結果煲呔曾最後都係用番大啲嗰個會議室開記者會。

搬竇開記招 勞民傷財

不過，煲呔曾咁樣郁一郁，班傳媒朋友同工作人員就多得佢唔少。班攝影師駁線麻煩唔在講，工作人員都要臨急臨忙搬過個布景板，真係做到一肚氣。政府一向封閉，啲衰嘢成日都收埋唔畀人知。我哋都問過政府中人，證實真係有個會議室係開記者會用，但依家仲整緊未用得。政府不嬲勞民傷財效率低，個會議室幾時有得用真係冇人知。

新立法會趕頭趕命要啟用，等煲呔曾喺新地方讀佢最後一份施政報告，結果甩漏百出，勉強趕得切入伙。趕得一樣趕唔到第二樣，煲呔曾任期得番七個月多啲，嗰間超豪嘅記者會會議室，就與佢無緣喇。