中環出更：踢西瓜波 名人回到「那些年」
紅白間條嘅塑膠波又名「西瓜波」，相信陪伴住唔少人成長。小童群益會為慶祝成立七十五周年，尋日搞咗個西瓜波足球邀請賽，榮譽會長胡經昌、執行委員會主席鍾志平、督導委員會主席勞永樂齊齊踢西瓜波，重拾童年回憶，大家都踢得好落力。
勞永樂話，以前讀中學嗰陣，學校因為驚學生踢爛嘢，所以禁止學生用皮波，而且皮波價錢貴，惟有買五毫子一個西瓜波過住癮先。佢話當年幾乎日日踢西瓜波，一到小息，成個球場旋即「西瓜」橫飛，可見喺當年幾咁受歡迎。
鍾志平唔知係蔣震發明
平時西裝骨骨嘅鍾志平，一講踢波即興奮到手舞足蹈，但係佢玩咗西瓜波咁多年，原來唔知個波係由有「注塑機大王」之稱嘅工業界翹楚蔣震發明喎。胡經昌嘅小學同學、活動籌委會主席吳彥明仲踢爆胡經昌讀書時喺走廊用荷蘭水蓋當波踢，結果畀老師罰企。
同場仲有前足球運動員山度士同哥哥Steven組隊參賽，佢話家有五兄弟，個個都鍾意踢波，以前住喺觀塘屋苑，五兄弟當正升降機口係足球場，度度都踢一餐，唔怪得佢咁好腳法。