中環出更：阿仔畢業觀禮 健波不惜破「金身」
民生問題千瘡百孔，如今做議員唔懶得。立法會議員陳健波原來有一項堅持，就係去晒立法會大小會議，去年佢嘅參與率就達到百分百嘞。不過佢預告，嚟緊未必能繼續做一個完美嘅議員。
健波尋日拖埋太太入沙田馬場消遣，風騷地話畀卓妮知，明年六月就係囝囝大學畢業，佢已訂好機票，飛去美國華盛頓大學觀禮。呢次都算犧牲大。講嘅唔係機票貴，而係健波不惜寫花「零缺席」紀錄，請假一星期，但能夠見證阿仔戴四方帽，犧牲都值得。
張永霖聖誕寧願返溫哥華
前教統局局長李國章（阿瑟王）就有孫萬事足，聖誕將飛去美國，探望細仔及一歲大孫兒，之後再飛倫敦探行醫嘅大仔，咁忙，都係過埋農曆新年先返香港嘞。佢話早幾年太太大病一場後，好珍惜兩公婆能悠閒過生活嘅日子。同場仲有港大專業進修學院校董會主席張永霖（Linus），佢同太太Silvia入場為老友打氣，可惜食白果。聖誕就到，Linus話寧願返溫哥華玩，理由係香港空氣太污濁喎。
講番跑馬，鄉議局主席劉皇發公子劉業強同愛沙尼亞共和國駐港名譽領事林建康夾份嘅團體馬「精彩日子」，尋日大熱勝出第十一場，獎金逾五十一萬。咁高興，林建康媽媽都嚟撐場。
卓妮