人比人，比死人，錢比錢呢？激死人！
呢嗱嗱嗱，澳門政府又派錢喇，今次已經係第六次還富於民。睇下人哋梳打埠吖，派得慷慨豪邁，派得皆大歡喜，而且金額創出新高，永久居民人人獲派七千元，非永久居民都有四千二百元，合資格人士中央儲蓄戶口注資六千元。
另外，澳門政府仲推出一連串紓困措施，包括每人發放五百元醫療券，向六十五歲以上長者發放六千元敬老金，向學生發放津貼，向年滿十五歲以上居民發放進修資助。未講完㗎，薪俸稅有得減免，社屋全年免租，紓困措施多到十隻手指數唔晒。
相比之下，香港政府簡直係醜死怪，莫講話派錢六千元唔夠人哋出手闊綽，更加攞膽嘅係派錢竟然派到怨聲載道。喂，記唔記得婀娜多姿嘅紫荊俠點解出手打救窮人呀？咪就係因為派錢計劃唔合理囉，一代女俠誓要親力親為撥亂反正。
「東方報業民意調查」發現，三成三受訪者稱讚澳門政府做到以民為本；兩成三坦言港人得個恨字；兩成二覺得澳門政府派錢疏爽。對於香港派錢引起好多爭拗，四成八批評港府受壓先至派錢，並非真心紓困；兩成直斥港府派錢亂七八糟；一成五指摘港府係守財奴心態。
所以話啫，一個連派錢都搞到雞手鴨腳嘅政府，根本冇資格侈談強政勵治。如果你話香港家道中落窮到燶，紓解民困有心無力仲可以賴係非戰之罪。之但係咁，財政儲備加上外匯儲備高達二萬幾億喎，又唔似得歐豬五國債務纏身，咁都孤寒成性就要打屁股啦，吓話！
上述民調顯示，港澳兩地同樣面對歐債危機等外圍因素影響，三成六受訪者埋怨港府只識搵藉口拒絕還富於民；兩成三直指澳門施政能力比香港好；兩成一認為港府無能，冇信心面對危機。
唉，龜兔賽跑本來只係寓言故事，點不知居然成為事實。回歸之前香港乜都領先澳門，回歸之後，香港呢一隻不思進取嘅大笨兔瞓懶覺，澳門終於亦步亦趨從後超前。三成九受訪者覺得香港愈來愈差，澳門愈來愈好；一成九認為香港被澳門迎頭趕上；一成一歸咎中央對香港放任不管，令形勢落後。
人又派錢，你又派錢，香港點解可以派得咁樣衰嘅呢？難怪監察團體醒咗港府九粒字：欠視野，欠承擔，欠理智。
計功夫茶話齋，萬一有人真係畀香港派錢計劃激鬼死，未嘗唔係好事嚟㗎。你知啦，一旦瓜老襯聽講就有權投胎轉世，如果激鬼死咗咯喎，咪向閻羅王許一個願囉，來生想做澳門人，睇怕閻羅王都唔會覺得願望太過分。