夕陽政府只剩下約七個月時間，正一係時候無多，煲呔曾等收工的悠閒心態表露無遺，以佢舔到盡嘅性格，當然係趁有權有勢下到處行吓逛吓，剛從夏威夷回來，本報「政情版」日前話佢又想訪台。
擺到明，趁人未走、茶仍溫去「訪問」台灣，一來懷舊吓「那些年，與老婆到台灣度蜜月」的往日情，二來吹吓水發揮自己「政治家」強項，無壞啫！講真，剩下幾個月，唔通仲講兩岸三地民眾利益嘅事咩，吹着口哨唱「阿里山的姑娘美如水」好過喇！
老朽成日都話煲呔曾治港七年，好嘅學唔到，內地高幹的處事風格，佢就得其神髓，且有過之而無不及。內地有順口溜：中央幹部忙組閣，省市幹部忙出國，地縣幹部忙吃喝，區鄉幹部忙賭博，村裏幹部忙偷摸。
煲呔曾地位點都唔輸蝕省市幹部，外遊有乜咁大不了！話之你明年二月香港有預算案要搞，三月又有北京召開全國人大及政協會議同香港嘅特首選舉，反正都係睇吓熱鬧等順利交接，當下最重要就係發揮利己主義，盡演舔到盡神功，民望低下回升無望，一於四月左右訪台，說不定了無牽掛，也能悟道：偶然飛去復飛還，幾見雲能離得山？舊路依稀猶可認，石橋流水第三灣。
人生際遇各有不同。煲呔曾潔身自愛，自是不會羨慕法國政客，因為英國小說家克拉克話「沒有情婦的法國政客就像沒有手槍的警長」；老朽該死！煲呔曾是「政治家」，才不稀罕甚麼情婦，課外活動免了，外遊才是他杯茶。