財爺鬍鬚曾去年破天荒發表「史上最廢」預算案，最後畀各界群起鬧爆下先至發晦氣咁向市民派發六千元了結咗件事，但鬍鬚曾嘅自我反省能力真係有限，佢非但沒有吸取上次慘痛嘅經驗，尋日喺網誌自爆又為任內最後一份預算案搞花臣，佢搵咗縱橫歌壇廿多載嘅實力派歌手林子祥唱《數字歌》，希望為預算案諮詢工作掀起序幕。
「三……○六二四七○○……」其實鬍鬚曾揀咗首傳頌多時嘅《數字歌》日播夜播本來都無可厚非，但錯就錯在首歌除咗一大堆數字外就同預算案根本冇乜關連，既唔會得到預期嘅效果，亦會搞到整個諮詢工作又再失去焦點。如果鬍鬚曾真係要揀首歌為預算案助拳嘅，應該揀同樣係林子祥唱，但係剛陽味較重嘅《男兒當自強》。呢個政府咁弱勢，如果仲唔自強一下，就無機會喇。
明年嘅預算案提早於二月一日宣讀，梗係喇，踏入三月，全部人都睇住特首選舉，仲邊有人得閒理呢個弱勢政府？