政情：蕭楚基呻最低工資惡頂
通脹壓力加上最低工資，好多做老闆嘅都話生意難撈。海皇粥店集團執行董事蕭楚基（Caecage）話，加舖租雖然難頂，都唔夠最低工資難頂，如果政府再上調最低工資嘅話，好多零售業都會捱唔住。
Caecage話，開舖成本不外乎舖租同人工。香港寸金尺土，舖租一定貴，做老闆似打工仔多啲，賺到都上繳晒畀業主。早前有團體要求政府再調高最低工資水平，Caecage話萬萬不可。佢話，廿八蚊最低工資實施之初，集團已經每月支出多五十萬，經營都幾吃力，好彩佢哋係走大眾化路線，食品價格唔算貴，基層客冇流失咁多。
佢話，其實自由市場會自動調節工資水平，毋須強硬制訂最低工資，「例如請個洗碗工，廿八蚊請唔到咪加到三十蚊，加到請到為止囉。」佢仲話租金同經濟環境掛鈎，經濟差租金自然會下調，但人工只有加，冇得減番轉頭。長此下去，佢驚香港會步上希臘同西班牙嘅後塵。