政情：人民力量預告衝擊特首選舉
明年嘅特首選舉，得千二人有份投票，根本係小圈子選舉。但反建制嘅人民力量都可以參與其中，因為黃毓民同陳偉業都係立法會議員，憑呢點已進身為當然選委，有得投票。毓民話佢同大舊唔會提名畀任何人，亦唔會投票，反而會以選委身份衝擊票站，以凸顯制度嘅荒謬。毓民仲話會邀請民主黨劉慧卿一齊衝擊，只怕卿姐覺得「太暴力」而拒絕喎。
人民力量喺尋日舉行集思會，主席劉嘉鴻認為議席得失唔緊要，最重要係畀選民有個選擇，所以唔需要更改人民力量路線。毓民又講到明，話下年立法會同特首選舉，人民力量一定有搞作，好似特首選舉，就會同陳偉業入去抗議，又會當眾質問特首候選人。到立法會選舉，更會喺超級議席發動投白票運動，希望市民以選票反對呢個變相功能組別。
人民力量喺今屆區選大敗，但仍然受到支持者嘅擁護，毓民話區選之後，雖然無搞籌款活動，但已收到廿幾萬捐款，而且唔係單一捐贈，係好多支持者一齊捐助嘅，證明人民力量吸水力仍然高企。