政情：郭炳聯帶邵琪偉上天際100
國家旅遊局局長邵琪偉日前率領代表團嚟香港進行考察。佢今次嚟係為咗了解吓香港嘅旅遊業發展，當然唔少得去香港嘅最新地標「天際100香港觀景台」睇吓，新地標嘅主人家、新地副主席兼董事總經理郭炳聯仲親自招待佢。
天色陰沉 景觀朦朧
不過呢幾日天色陰陰沉沉，就算居高臨下望出去都係灰蒙蒙一片，真係有啲可惜。
郭炳聯仲話，觀景台四月開業到依家，訪客人數係咁升，而且九成嘅遊客都話會向親友推介。
佢又話愈來愈多內地官員到香港訪問，相信有助佢哋吸納內地旅客咁話。
而邵琪偉對此行亦都非常滿意，佢仲話喺觀景台鳥瞰香港令佢有全新嘅體驗、大開眼界喎。