政情：王國興領軍出戰港島
明年立法會選舉新增五個直選議席，首次打正旗號參加區議會選舉嘅工聯會取得佳績，據聞工聯會決定「肥水不流外人田」，由新界西立法會議員王國興領軍衝擊港島區，首當其衝係有意喺港島爭取兩席嘅民建聯，除此以外，成立不足一年嘅新民黨亦蠢蠢欲動想「坐一望二」，建制派個個都雄心壯志想喺港島闖出一番天地，但僧多粥少下相信一定有人冇得留低，又失議席又傷感情嘅情況隨時出現。
區議會選舉塵埃落定，打正旗號走基層勞工路線嘅工聯會成功擴張版圖，喺全港取得廿九席，既取得接近兩張超級區議會入場券，亦喺港島區同新界西連取多席，特別係港島區，至少有五至六名地區樁腳，踩入港島區可謂指日可待，據聞工聯會已經把攻入港島區嘅重任，交託畀身兼工聯會港島區辦事處主任嘅王國興身上。
其實王國興從前係東區區議員，後來轉戰新界西，今次衣錦榮歸，真係不可以同日而語。王國興去港島區為工聯會卡位，備受內外夾擊嘅民記形勢最危急，因為民記對由誰人領軍爭奪第二席仍然十五十六，民記副主席張國鈞同東區地膽鍾樹根都各有擁躉，加上與部分票源重疊嘅王短兵相接，民記嘅港島區選情未許樂觀。
中產政黨 磨拳擦掌
除此以外，多個矢言代表中產嘅政黨亦非善男信女，靜待時機從中漁人得利。由前保安局局長葉劉淑儀帶領嘅新民黨喺區會連取四席，並首度攻入由泛民主派盤據多時嘅太古城東選區，士氣大振嘅新民黨隨時可「偷雞」爭奪第二席。「光復」中西區山頂選區嘅自由黨亦氣勢如虹，隨時把進軍港島嘅計劃死灰復燃。
話時話，二○一二年立法會港島區由六席增加至七席，泛民主派同建制派喺港島區一直有「六四黃金比率」，建制派頂多取得三席，但各大黨派都擺出捨我其誰嘅格局，再係爭持不下分分鐘會再次益咗泛民，到時大家真係喊都無謂。