中環出更：莊偉茵一身紫色催旺財運
沙田馬場尋日舉行國泰航空盃賽，國泰航空公司企業事務董事莊偉茵（Quince）同老公一齊嚟撐場。卓妮見Quince一身紫色打扮，由套裝裙、眼影、戒指到指甲油，清一色都係紫色，連老公件恤衫都係紫色，唔通佢想催旺財運，贏到發紫？
卓妮讚Quince套衫好有中國味道，佢話身上呢套衫係真絲質地，喺北京街舖買嘅。Quince話自己好支持國貨，因為國貨價錢平、質料好，最緊要唔會同人撞衫。佢笑笑口話每次出街之前，都好苦惱着乜嘢衫，因為萬一同人撞衫，又會畀人大做文章。
講起着衫，時裝店H&M同意大利品牌Versace合作推出咗限量衣飾，香港排晒長龍，Quince話佢當日身處巴黎，見到當地一樣排大隊。所以話，排隊文化唔係香港獨有，原來連西方都一樣。
咁啱得咁蹺，國泰航空馬會短途錦標賽跑出嘅「小橋流水」，咁啱個騎師巫斯義件衫都係紫色，Quince話自己買位置中咗，睇嚟紫色真係當旺喎。