中環出更：黃楚標籲忍手咪買內地樓
近日內地房地產行業增長放緩，卓妮尋日喺沙田馬場見到「深圳王」東海集團老闆黃楚標，佢話目前內地樓買唔過，要買嘅話，至少等多半年先好買喎。
至少等半年先入貨
黃楚標話，現時內地政策限制市民買樓數量，等到內地福利房落成一定嘅數量，政策先會放寬，所以要買內地樓，半年後先啦。
陳強睇好香港樓市
佢分析，內地樓市由○八年至今，升咗五、六成，內地出招抑制樓市，依家先回調一成左右，大有下調空間，唔使急住買，就算買都只係適宜自住。不過長遠嚟講，黃楚標依然睇好內地樓市。
卓妮仲見到喺深圳、海南同汕尾都有唔少房地產生意嘅廣東社團名譽會長、德強地產投資有限公司董事長陳強，佢都同意話喺內地買樓要審慎啲，反而繼續睇好香港樓市。佢尋日同太太Shirley以及二仔陳賢翰（Terence）、四女陳嘉慧（Bobo）一家入馬場，原來陳強前日趁住仔女喺外國放聖誕假返港，一家七口齊晒腳，去咗澳門睇格蘭披治大賽車，第一次睇賽車嘅Bobo大呼過癮，而今次佢哋一家入馬場，係為咗幫剛滿十八歲嘅Bobo行成人禮。
Terence同卓妮講，佢最近跟爸爸入咗潮州商會，不過只係普通會員，依家仲讀緊中文大學藝術系嘅佢話，畢咗業之後，佢會更投入於商會嘅會務。
卓妮