政情：黨友勸田少出戰新東
自由黨今屆區選，除咗中西區山頂選區成功復仇外，其他選區都成績麻麻，包括榮譽主席田北俊起家嘅新界東各區都冇乜起色，按形勢完全符合田少計劃明年立法會選舉空降港島區參選嘅念頭。不過，前晚該黨舉行集思會期間，班黨友仍然傾向田少出戰新界東，除咗因為港島議席出現「僧多粥少」外，亦相信支持該黨嘅鄉事票未能喺區選中反映，相信到立法會選舉先至浮面。
自由黨集思會上，大家都集中討論明年立法會選舉部署，支持田少去新界東嘅黨員話，新界東加到九席咁多，喺比例代表制下，分分鐘兩萬票就當選，但如果空降戰況激烈嘅港島區，當選機會自然減少。加上新界東仍然有鄉事派撐腰，就算區選無幫助，去到立法會選舉，點都幫到少少，所以喺新界東出選，仍然係穩陣之選。
至於港島區，有黨員就希望副主席周梁淑怡落場，排名單第二位，利用知名度力谷新人上位。至於邊個排第一，據聞有可能係負責統籌今次港島區選戰嘅東區區議員邵家輝。不過，建制派選舉好講協調，勝算唔高隨時畀人踢出局，所以依家講邊個出選，仍言之尚早。