中環出更：李文斌數回收紙皮 看經濟
要睇環球經濟好與壞，除咗睇局勢同股市行情外，唔一定要數貨櫃同定單量嘅，身兼仁濟醫院董事局主席嘅理文造紙董事總經理李文斌（Edmond）就有套獨特見解，佢話數回收舊紙皮一樣得喎。
Edmond話，其公司除咗造紙品生意外，仲會做埋廢紙回收再造，其中一種收得最多嘅紙，就係紙皮喇。點解睇回收舊紙皮可以睇到經濟情況呢？原來好多貨品都係用紙皮箱盛載，一個國家嘅回收舊紙皮出口量愈多，即係話啲貨品去得愈快，代表經濟好囉！佢將「紙皮論」套落環球經濟上分析，其實美國經濟冇大家想像中咁差，但歐洲經濟就認真麻麻喇。
獲委入社福諮委會
早前政府預告，來年環球經濟將會係嚴峻嘅一年，Edmond坦言對家族業務唔多唔少都有影響，但佢早已有心理準備，事關經濟一定有升有跌，冇得擔心，亦都冇得控制喎。不過，無論經濟幾差都好，Edmond都不忘做善事，尋日佢就獲政府委任為社會福利諮詢委員會新成員，多個渠道關注弱勢社群。