中環出更：紅十字會頒獎 表揚大義工
骨科名醫高永文熱心公益，單喺紅十字會，已奉獻十七年青春，尋日獲大會頒發「優異服務榮譽獎章」；至於合和實業主席胡應湘太太胡郭秀萍仲勁，瞓身幫紅十字會三十年，獲頒「三十年服務獎狀」。呢個獎，多少暴露胡太芳齡，難怪佢笑笑口話，真係又愛又恨。
香港紅十字會尋日舉行周年大會，匯報多個災區過去一年嘅賑災進度，順便頒獎表揚幾位熱心助人嘅義工。
身為紅十字會總監嘅高永文榜上有名，佢謙稱獲獎並非個人努力，但回想一幕幕救災經歷，卻是歷歷在目。
高永文闖游擊隊重地
最觸目驚心一次，係南亞海嘯後直奔重災區斯里蘭卡救災，坐住吉普車由中部直闖東部，走近泰米爾游擊隊重地時，十面埋伏嘅緊張氣氛，真係一步一驚心。
四川大地震後，高永文又經常往德陽假肢及康復中心治療地震傷者，三年來風雨不改，認真係唔話得。
同係紅十字會總監嘅胡太都唔輸蝕，咪睇佢嬌滴滴，帶隊救災絕不托手㬹。胡太話，難忘有次去山區探訪災民，睇見對方捧住爛碗，吃住已發黑嘅蔬菜，心酸到流下眼淚。難得嘅係，當地人從不怨天尤人，令佢好感動。
骨科聖手潘德鄰都係大義工，獲頒嘉許狀。四川地震發生後，佢係首批到當地救人嘅先頭部隊，睇住痛失下肢嘅傷者，喺義肢協助下重新站起來，激動心情，非筆墨可以形容。
卓妮