母被指欠債走佬 沈集成劃清界線
【本報訊】著名練馬師沈集成的母親被街坊「唱」欠債「走佬」，沈集成被師奶致電投訴。兩名元朗師奶聲稱兩月前替沈母做擔保人向大耳窿借錢，豈料三日後沈母失去聯絡，擔保人被迫每月代還一萬五千元利息，曾致電要求沈代母還債，沈嚴詞拒絕。沈集成回應事件稱﹕「佢（母親）嘅事我一概唔知﹗」又指其母同任何人的瓜葛，都不能在他身上拿錢。另一方面，他不能確定事件孰真孰假，拒絕評論。
兩師奶作擔保借錢
被街坊指欠債的姓黃（六十九歲）婦人，居於元朗區，與丈夫育有兩子一女，長子沈集成為練馬師。街坊稱，有人沉迷賭博，常到麻雀館打通宵麻雀，又到賭船和澳門賭場豪賭。其中一名為黃作擔保人的陳太（化名）稱﹕「兩個月前，佢係咁求我哋幫佢做擔保人，求咗幾日，我同另一個街坊就心軟應承佢囉！」兩婦做擔保人後，黃三日後便失蹤。陳太嘆謂：「都係自己蠢，識咗佢咁耐，見佢咁慘先幫佢，佢成日話自己個仔係練馬師搵好多錢，點知佢會咁樣走咗去。」
「佢響出面做任何事、同任何人有瓜葛，都唔可以響我身上攞到任何錢！」沈回應記者查詢時強調，已有十多年沒與母親聯絡，他坦言：「我哋好多年無聯絡，對佢嘅嘢一概唔知。」他指自己有盡兒子責任，每月透過銀行戶口轉帳六千元給母親做家用，並指他自己有家人要照顧，不可能出錢縱容母親賭錢。沈承認曾接到自稱受害人的來電，但他不知道事件真確性，「就算係真，佢哋根本就唔應該幫人做擔保啦，佢哋當拎個教訓，自己負番責任囉！」