功夫茶有一位朋友最近去過日本遊山玩水，佢話日本乜都貴過香港，食碗拉麵都要接近一百大元，唯獨是自駕遊最開心。點解呢？原來日本油價比香港便宜一大橛，同樣入滿一缸油，香港盛惠八百幾，日本只係四百幾。
嗱，功夫茶真係唔知點解，香港燃油價格貴到冇朋友，以車代步嘅上班一族次次入油都牙痛咁聲。油價高企更加係通貨膨脹嘅元兇之一，運輸業界負擔沉重就會將成本轉嫁消費者。由於油價實在太高，而且經常出現「集體行動」以及「加快減慢」，所以油公司有一個綽號叫做油魔。
既然油魔肆虐，號稱福為民開嘅特區政府係咪應該做一做驅魔人呀？理得你用十字架定係桃木劍，總之就要驅魔。可惜吖，環境局局長邱騰華與魔為伍，一直以自由市場作為藉口，袖手旁觀任得油魔予取予攜。
消委會終於出手調查，睇睇油公司有冇搵笨。消委會分析○七年一月至今年七月，五十五個月以來，國際原油同本地柴油零售價嘅變動。得出嘅結論係咁嘅，冇證據顯示油公司之間有協調價格，同樣冇加快減慢，之不過咁，柴油零售價的確有加多減少嘅情況。
加價嘅時候風風火火，減價嘅時候溫溫吞吞，油公司呢一招加多減少真係毒辣。消委會發現，扣除稅項及即時入油嘅折扣，柴油零售價同國際原油價格比較，每公升平均差距由○八年七月之前嘅港幣三元，一度跳升至近六元，之後先至稍為回落。根據推算，部分油公司利潤喺過去五年顯著增加，估計由每公升三仙增至八毫三仙。簡單咁講，油公司愈賺愈驚人，每公升利潤暴升二十幾倍！
消委會就話嘞，油公司應該考慮用實質數據向公眾解釋有冇利用市場價格波動從而獲取更大利潤，外國都有石油產品出現寡頭壟斷，希望油公司增加透明度，並且透過競爭法監管。
油公司愈賺愈驚人，等於小市民愈窮愈見鬼。你試下要求老闆加薪二十幾倍抗衡油價吖，恐怕你即刻投身失業大軍。
消委會實牙實齒指明油公司加多減少，功夫茶想問一問邱騰華局長，如果閣下咁都唔去監一監再管一管，係咪想小市民上街怒吼呀？你知啦，職業司機唔係幾好老脾，曾經由於不滿油價飆升而慢駛抗議，試過擺出長蛇陣塞爆中環。萬一再有類似事件，甚至聯同其他反資本主義示威者一齊佔領中環，咁就天下大亂咯！
油魔加多減少，監管似有還無，好心邱騰華唔想做就退休啦，唔一定要等到明年政府換屆㗎。