政情：舊立會秘藏陳年艷照
還有一個星期左右，中環立法會舊大樓就要交還政府，呢座見證過唔少歷史時刻嘅大樓，如今人去樓空，但回憶永遠會藏喺各人腦海之中。尋日我哋趁住舊大樓未變回法院前夕，再次走入去參觀，發現咗唔少歲月痕迹，最特別係喺地牢機房發現貼有陳年日本美女嘅性感水着海報。
若要數舊大樓最神秘嘅地方，莫過於地牢機房。由皇后像廣場嗰邊嘅記者出入口進入後，會見到通往地牢機房嘅門口，沿樓梯走落一層，就可以到達有少少噪音、臭味同悶熱嘅機房。傳聞舊大樓有秘道通往舊皇后碼頭，但我哋走勻成個機房都搵唔到。
不過，機房控制室入面，就發現貼有三張已經變黃、不知名嘅日本美女性感水着海報，可見以前喺機房工作嘅人員係幾咁苦悶。