政情：津國總統訪城大捧愛女
尋日係城大畢業禮，唔知大家有無留意城大嘅保安安排呢？事關非洲國家津巴布韋總統穆加貝（Robert Mugabe）夫婦尋日都嚟咗香港出席佢哋個女波納穆加貝（Bona Mugabe）嘅畢業禮。波納喺城大讀會計，穆加貝總統就話好多謝本港對佢個女嘅保護喎。不過，佢哋嚟到未必要警察保護，因為聽講佢哋有私伙秘密警察，要埋佢哋身未必咁易。
穆加貝夫婦一直都好鍾意香港，除咗送個女嚟香港讀書，第一夫人格蕾絲（Grace Mugabe）仲好鍾意嚟香港度假，○九年喺香港度假嘅時候，格蕾絲就涉嫌攻擊外國記者。其實佢哋兩夫婦仲好鍾意喺香港消費，○八年就喺大埔買咗幢豪宅，好似落地生根咁款。
其實今次穆加貝總統來港係做官式訪問，下一站仲會去埋北京添，目的係為津巴布韋尋求投資者。津巴布韋受到惡性通脹影響，當地失業率高企，又受霍亂問題困擾，令津巴布韋試過被選為最不適合居住嘅城市。