政情：泛民內訌 各懷鬼胎

公文袋喺區議會選舉輸到趴街，被選民離棄之餘，其實白鴿黨亦有唔少人好憎公文袋，密謀喺明年立法會選舉前同公文袋割席，並度橋搶埋對方嘅現有議席。總之就係泛民內訌加劇，各黨派各懷鬼胎，四分五裂。

公民黨勢危求協調

公文袋喺區選落敗，但以袋巾傑為首嘅一眾黨領導層，不但冇總結經驗、查找不足，反而死不悔改、無人問責、仲諉過於人，將敗選責任推卸畀對手抹黑、中方干預及選民無知，聲言要同白鴿黨等其他泛民黨派商討，點樣同社民連及人民力量割席，仲要求重新定義何謂「泛民」，企圖將被視為暴力激進嘅社民連同人民力量踢走，再團結上路迎戰立會選戰。

不過，白鴿黨中人就翻袋巾傑舊帳，話去年公文袋同社民連等人強推「五區公投」時，又有冇顧及泛民團結，亦無幫當時畀社民連狂砌嘅白鴿黨出過聲。所以對於公文袋想同白鴿黨商討立會選舉部署，白鴿黨中人就話多謝晒夾盛惠喇！皆因佢哋覺得選民主要不滿嘅係公文袋喺外傭居港權同港珠澳大橋官司嘅立場，以及社民連同人民力量嘅暴力政治，繼而透過選票踢走呢三個黨，白鴿黨同民協等溫和民主派並冇顯著跌票，新民主同盟同街工甚至有議席進帳，證明真係喺區選大敗嘅只係「公、社、人」三黨。

明年立會選舉奉行比例代表制，白鴿黨相信好多選民、尤其係傳統泛民支持者，喺有得揀之下會將選票投番畀佢哋，因此白鴿黨即使唔同公文袋公開割席，亦要喺政綱同形象上與對方劃清界線，並大舉派人參加地區直選，務求搶番晒失去嘅票源。而且白鴿黨嗰班喺區議會當選嘅八十後都希望個黨可以年輕化，畀佢哋排隊參選立法會，到時分分鐘殺出一條血路。

如果白鴿黨呢個如意算盤打得響，公文袋下屆隨時只係輸剩港島陳淑莊、九東袋巾傑同法律界功能界別三席，淪為冇實質影響力嘅邊緣細黨。