中環出更：白松露飄香 名人各「食」各法
本年度頂級白松露王，近日駕臨香江。誘人濃香傳千里，吸引城中名人雲集，日前齊集中環高級餐廳豪歎一番。白松露食法千變萬化，富豪趙世光千金趙式和（Jane）愛刨幾片灑上意粉；社交名人李桂蘭（Olivia）就話，以白松露配雞蛋，餘韻之香，好比與愛人深情一吻。
珍稀昂貴嘅白松露，每年都舉行拍賣會，今年嘅「第13屆阿爾巴白松露拍賣會」，善款將撥捐「成長希望基金會」。
身為該基金會籌委會委員嘅Jane，拉埋老公李承康齊買枱做善事。Jane自小已是白松露迷，每逢季節到，都會同家人齊品嘗。李承康就謙稱味覺唔夠敏銳，喜歡以嗅覺「品嘗」。
「公職王」鄭慕智（Moses）都聞香而至，佢話每季都會食番幾轉白松露，否則心情囉囉攣喎。當晚六道菜式，分別由世界級大廚兼有「白松露之王」美譽嘅岑柏濤（Bombana）設計菜單，以日式、意式及粵式炮製驚喜。Olivia激讚「宮崎和牛配白松露」、「蛋白白松露炒大閘蟹」及「松露朱古力」最出色。
詹康信等歎「菌王」
「成長希望基金會」顧問兼美國商會前主席詹康信，即場以逾百萬元投得「白松露王」做善事，話咁快尋日已經到手，佢話今次拍賣好有意義，因為既可做善事，又可滿足味蕾。
佢又話，一般白松露只重一百克，約一個高爾夫球咁大，但佢今次投得嘅白松露共重一點二五公斤，真係十分罕見，加上白松露愈大件質素愈好，所以用來炮製佳餚嘅效果令人非常期待。
為咗要令手上白松露嘅優點發揮得淋漓盡致，所以一樣委託岑柏濤設計一張傳統意大利菜菜單，宴請近四十位好友。
至於白松露宴日期仲未確實，但相信唔會拖好耐，因為白松露嘅最佳食用期限只得個多星期嘛。
卓妮