政情:葉劉斥高官飲宴扮大牌

煲呔曾早年曾建議政府問責官員走入群眾,但過去幾年只聞其聲未見認真落實,高官仍然脫離群眾施政,開放式諮詢更加係絕無僅有,本身係前高官嘅新民黨主席葉劉淑儀仲爆料話,有高官去完飲宴後手都唔握就咁走人,另有高官嘅個性就好深閨喎。

建制派喺今屆區議會選舉取得佳績,大家都關心佢哋日後同政府有乜互動,身兼行政會議成員嘅民建聯劉江華率先話,港府應該喺制訂政策出台前多聽意見,否則「出台撞板先收番係唔理想」,佢同時又話唔單止直選議員要聽最底層聲音,問責官員都應該咁做喎。

劉江華暗批完班高官後到葉劉接力出招。葉劉話自己睇到啲高官出席飲宴時,食完幾道菜後好似好應份咁就走咗去,相反佢哋走嗰時會成張枱握過手先走,劉江華更加話佢會成場握完手先走添。葉劉之後仲話,有啲高官好少落立法會,有啲個性仲好深閨喎。深閨嘅高官,又點以民為本呀?

「Money18免費即秒股票報價網站」現推出8升級功能,財經資訊,實時實發!