政情：田少遊大澳學整鹹蛋黃
自由黨榮譽主席兼旅遊發展局主席田北俊，早兩日坐昂坪360殺入大澳，話要向嚟香港參展嘅商貿旅客推廣大嶼山嘅好去處，佢仲學整鹹蛋黃添，咁好玩，真係可以推廣吓喎。
田少一到大澳，即刻「掃街」試當地小食，試完炭燒魷魚，又試特色飲品，總之食個唔停。唔少居民見到田少都要求同佢影相，田少都有求必應。試完小食，田少就去咗一間教遊客整鹹蛋黃嘅舖頭，即場「拜師」學整鹹蛋黃。不過，田少睇完人哋示範後，面有難色，唔知係驚自己搞隻鹹蛋唔掂，定係怕整完周身鹹蛋味。但佢最後都除咗外套，摺高衫袖，落手整鹹蛋黃。
話說田少一手打開隻鴨蛋，跟住依照師傅嘅方法，將隻蛋黃左手交右手，盡量「fing」甩啲蛋白，田少玩得興起，仲不停加速，佢話︰「你睇吓，（蛋黃）咁都唔爛喎。」田少玩完一輪，將蛋黃放落竹簍度，跟住灑啲鹽喺蛋黃表面，宣布大功告成，田少又不忙補多句︰「都唔係好難啫。」整完唔知佢會唔會食番呢？