政情：發叔犧牲小強
選舉委員會選舉話晒都係小圈子選舉，不同界別分組如果可以嘅話，最好搞等額選舉，咁做大家都可以免煩。據聞鄉議局就係為咗免煩，寧願犧牲副主席林偉強，唔撐佢連任區議會主席。
我哋之前講過，鄉議局因選委席位分配不均，惹來南約嘅鄉事委員會不滿。據聞最新消息係雙方經過多番討價還價後達成協議，鄉議局主席劉皇發決定犧牲人稱「小強」嘅鄉議局副主席林偉強唔做離島區議會主席，換取選委界別嘅席位安排維持原建議。究竟大家會否恪守呢個君子協定，真係要拭目以待嘞。不過事件反映小強同鄉議局部分人真係有好深嘅牙齒印。
鄉議局選委界別今年由廿一人增至廿八人，發叔決定將廿八席選委平均分成四組，即三組分別分到七席共廿一席，其餘七席由佢聯同兩個副主席張學明同小強研究同挑選，本來與會者都冇人反對呢個建議，但事後就傳出南約有所不滿，有人仲威脅話一旦協調不果，唔排除會出來參選，令鄉議局選委界別破天荒需要投票，搞到發叔即時要諗橋睇吓點樣理順啲反對聲音，包括容許不滿嘅鄉紳提出條件作為和談嘅基礎。
冇得做離島區會主席
據聞最新消息話發叔同不滿嘅鄉紳達成共識，有知情人士話，不滿小強嘅鄉紳表明，即使港府稍後委任小強做離島區議員，都唔可以畀佢做離島區會主席，寧可支持同樣有鄉事背景嘅現任區會主席周玉堂連任，換取對發叔嘅選委分配建議不持異議，即係應承唔攪亂發叔盤棋。可靠消息話，發叔衡量輕重後，決定顧全大局接受有關條件喎。
老實講，發叔過去十幾年無論小強幾咁不濟都力挺到底，正所謂養兵千日用在一時，小強都係時候向發叔投桃報李，「犧牲小我，完成大我」，相反依家大家最擔心嘅係會唔會有人過橋抽板無口齒，搞到大家嘅互信基礎冇晒，第時就好難再有討價還價嘅空間喇！