中環出更：蒙德揚嘴刁 最愛鮮磨米
沙田馬場尋日舉行樂聲盃賽，信興集團副主席蒙德揚（David）請嚟靚仔日本精米師即席教大家點樣用日本米煮出香軟綿滑嘅白飯，仲做東請大家食獨門秘方「蒙氏咖喱」。佢話自己對米飯好講究，要食新鮮磨嘅米，貪佢米味夠香，不過鮮磨米賞味期有限，最好食幾多買幾多，過咗期就唔好食喇。
甘琨禮懷念元朗油粘米
鏞記酒家集團董事總經理甘琨禮（Ronald）即場試食精米師煮嘅飯，大讚外軟內滑。不過點好食，都唔夠以前元朗油粘米咁正。佢一臉回味咁話，油粘米嘅粒頭細，最好揀新米，因水分同油分保存得好，零舍有米味，如果用佢嚟配「蒙氏咖喱」就一流喇。
不過往事只能回味，Ronald話依家大部分人已經習慣咗食泰國米，但隨住泰國米價上升，將會由澳洲同越南米取代喇。
David話，泰國水災嘅影響仲大過日本三一一地震，原來佢公司有唔少產品同原材料供應商嘅廠房都喺泰國，今次損失幾大未計到，惟有另覓供應商。展望來年全球經濟，佢認為會係艱苦嘅一年，公司惟有開源節流，但承諾一定唔會裁員喎。