中環出更：大師教品酒 鄭錦鐘開竅
世界品酒界權威Robert Parker日前旋風式訪港，面對面同飲家齊品酒。保良局副主席鄭錦鐘（Eric）同總理陳細潔（Abbie）齊報名參加，入場費近二萬港元，但有大師傳授品酒功力，兩人都話值回票價。
Robert Parker日前訪港，逾六百位酒迷聞風而至，逼爆機場博覽館。品酒會朝早十點幾舉行，Robert挑選廿支法國2009年波爾多佳釀，神態自若安坐台上，教學員逐一品酒。Robert味覺驚人，「解剖」每支佳釀，帶大家經歷一次神奇味覺之旅，學員如啖甘露，狂抄筆記。
Eric首次親近大師，驚嘆其品酒功力深似海，平日鮮有留意嘅酒味，好似泥土味、皮革味、焦糖味等，經大師一點，即時有開竅感覺。
陳細潔入後台求合照
Abbie話，同Robert喺外國評酒會上早有一面之緣，但坐埋品酒，都仲係首次。佢把握機會走到後台要求合照，估唔到Robert一口應承，認真係開心過中頭獎。
話咁快，兩個多小時品酒會結束。學員飛奔到台前搵Robert簽名，可惜佢係大忙人，簽咗幾個名就走人。部分酒商爭取機會做生意，向學員推銷Robert點名讚好嘅紅酒。
Eric話，對Chateau Angelus 2009情有獨鍾，佢幾年前已訂購咗三百支賀孫兒出世。Abbie就喜歡La Fleur-Petrus 2009入口滑如絲，售價約一千港元，心思思想入貨喎。
卓妮